इलाम । इलाममा मेडिकल कलेज निर्माण गर्न स्वास्थ्य मन्त्रालय सहमत देखिएको छ । मन्त्रालयबाट आएको एक टोलीले इलाम अस्पताललाई आधार बनाएर त्यस आसपासको क्षेत्रमा मेडिकल कलेज बनाउन सहमति दिएको हो ।
मन्त्रालयको टोली र अस्पताल विकास समिति बीच भएको बैठकले इलाम नगरपालिकालाई मेडिकल कलेजका लागि आवश्यक जग्गा व्यवस्थापन गर्न जिम्मेवारी दिएको जिल्ला समन्वय समिति प्रमुख गणेशप्रसाद बरालले बताए । ‘सबै नयाँ व्यवस्थापन गर्नुभन्दा अहिले सञ्चालन भइरहेको अस्पतालको स्तर वृद्धि गरेर त्यसलाई आवश्यक पर्ने भौतिक पूर्वाधार निर्माण गर्दा सहज हुने पनि देखियो ।’ बरालले भने ‘तर, इलाममा मेडिकल कलेज निर्माण गर्ने ग्यारेन्टी मन्त्रालयले दिनुपर्छ भन्ने हाम्रो प्रस्ताव छ । नत्र व्यवस्थापन गरिएको जग्गा अलपत्र पर्नसक्छ ।’ मेडिकल कलेजकालागि पाँच सय रोपनी जग्गा आवश्यक पर्ने जनाइएको छ ।
यसैबीच इलाम नगरपालिकाको सोमबार बसेको नगर कार्यपालिका बैठकले मेडिकल कलेज सञ्चालनका लागि आवश्यक पाँच सय रोपनी जग्गा इलाम नगरपालिकाले उपलब्ध गराउने निर्णय गरेको छ । नगरपालिका–९ नम्बर वडाध्यक्ष श्यामकृष्ण घिमिरेको संयोजकत्वमा जग्गा व्यवस्थापन समिति समेत गठन गरिएको नगरपालिकाले जनाएको छ । वडाध्यक्षको संयोजकत्वमा विभिन्न सरोकारवाला संघसंस्थासहितको जग्गा व्यवस्थापन समिति गठन गरिएको नगरपालिकाका प्रवक्ता ठाकुरनारयण श्रेष्ठले बताए ।
